Kanti Bade.. während ich dete gsi bin, eschs de puri Horror .. jetzt, Jahre danach, eschs eini vo de geilschte Ziite vo mim bisherige Läbe gsi.. 
Han grad uf de Homepage gseh, das es neu au Pix vo de Lehrer het, wo eus s'Läbe immer wieder ufs neue schwer gmacht händ. Gwüssi händ im wahrste Sinn vom Wort au spuure hinterlah.. man denke an Deuber und gwüssi Ätzige a bestimmte Körperteil.. autsch!!!
Einführungslager in Riemenstalden (1. Jahr)
Super lässig gsi.. momol.. s’Kaff het genau mal 79 Einwohner gha (han immer gmeint Frei-enwil seg scho öppe s’chlinschte wos git?!) Jedefalls het mer für i di nächsti Stammtischbeiz en Fuessmarsch vonere Halbstund de Berg ab müesse uf sich neh.. und nacher mit es paar Bierli intus wieder deruf. Highlights sind natürli au s’Fussballspiele zwüsche de Kuhflade, s’überloffene Männer-WC und s’Pizzabache uf em Grill gsi ;-)
Arbeitswoche in Cevio TI (2. Jahr)
Ganz tolls Lagerhuus, mir Mädels händ i de brüetende Hitz müesse unterem Dach ime Mas-seschlag schlafe, d’Jungs defür im feuchte Luftschutzkeller ;-(
S’Thema: .. chas nümme säge, bim beschte Wille ned! Aber es het irgendöppis mit Steibiige und Kunst z’tue gha..
Was i au no in Erinnerig han esch, das mer IMMER z’wenig zässe gha händ (obwohl für meh als d’Anzahl Lüüt kochet worde esch)!! In Nachtarbeit sind drum regelmässig Pizzas und Pasta us em Coop ufpache und kochet worde. (Mit vorhergehende Einkaufswägeli-Renne uf em Coop-Parkplatz will de blödi Lade so katastrophali Öffnigsziite gha het!!)
Au in Erinnerig blibe wird eus allne em Andri sis Wetttrinke mit.. ?! Jedefalls het er vom Böni und em Michi müesse us em Strassegrabe vor s’Lagerhuus treit werde.
Eigentli esch das Lager zwar no easy gsi.. de Blum het nach es paar Tag so d’Nase voll gha vo eusere Gruppe, das er am Morge eifach gseit het, mir sölled an Fluss go brötle, er well eus a dem Tag nümme gseh! Tip top gsi!
Chemie (-praktikum) (3. Jahr)
Ich hasse Chemie!! Ich weiss gar ned so rächt, öb ich zersch mit em Deuber oder de Chemie es Problem becho han.. aber das hängt ja wahrschinli au sehr eng zäme!! ;-)
A d’Prüefige bini eigentli nie i dem Fach.. zumindest ned a di vorgsehne. Has vorzoge, mich vom Deubi für d’Nachprüefig irgend ines Rüümli izbschlüsse lah und mich det mit all mine versteckte Hilfsmittel a d’Arbeit zmache.
S’Chemiepraktikum i de 3. Kanti esch dänn no d’Steigerig vo de normale Chemiestunde gsi. Zersch het mer sich en müffelnde wiisse Mantel dörfe azieh und dänn in Zweiergruppe ab go experimentiere. S’Problem: D’Tanja und ich währed e Gruppe gsi.. mer händ beidi gar nüt chönne und öpper vo beidne esch garantiert eh ned cho ;-(
Gäge Endi vo dem Praktikum hämmer irgend es Experiment mit Säuren gmacht. Super, die hämmer mal so schnell i de Luft gmischlet, und debi esch anschinend chli Säure uf min Stuhl tropfet. Manno het das weh tah! D’Hose esch au grad duregeätzt gsi, und d’Narbe gseht mer au hüt no! De Deuber het es mega schlächts Gwüsse gha und mich zum Arzt gschickt. Bini aber ned.. bi hei! S’Mami (Kindergärtnerin und OBERCHEMIKERIN), het dänn gmeint, ich söll uf d’Säurewunde doch öppis basisches tue, dänn tüeg sich’s scho usgliiche.. ;-)
Studienreise Catagna (4. Jahr)
Esch no schwieriger gsi, Lehrer zfinde, wo sich bereit erklärt händ, mit eus uf die Studiereis z’cho.. und natürli settigi wo au vo eusere Siite akzeptabel gsi sind: Blum und J.C. sind dänn mit eus uf Catagna cho. Flüge hämmer ned chönne, will das für bestimmti Rastas z’tüür gsi wär.. und das nur en Teil flügt, esch natürli ned gange ;-( Also, Zugfahre, grrrr!! Natürli häm-mer grad no en Tag breicht, wo in Balla Italia gstreikt worde esch. Sind z’obe spoht in Rom stecke bliebe und händ eus in Gruppe chönne losmache zum Hotelzimmer sueche. Het sich no als rächt schwierig usegstellt.. sind ja schliessli ned di einzige gsi wo ihri Reis händ mü-esse unterbräche..
Wo mer dänn nach ere ganz mühsame Reis endli in Catagna acho sind, esch de erscht Spannigshöhepunkt cho: Wie chömed Raffy und Co. belade mit Gras am Zoll verbi?! Aber de Hund det het eifach gar nüt chönne.. no problem!
S’Hotel esch de Hit gsi: mitte im Zentrum. I de Nacht hesch s’Gfühl gha, di hupende Autos fahred direkt am Näscht verbi!! Also i das Hotel mues glaubs nie meh e Klass us de Kanti Bade welle gah.. I gwüsse Zimmer sind Essensreschte eifach a de Zimmerdecki glandet und ständig hets Reklamatione geh..
Usflüg: De einzige wo de Böni, d’Tanja und ich mitgmacht händ, esch de uf de Ätna gsi. Het au glanget!! Am nächste Tag het de Blum gmeint, es sölled doch bitte nur no die mitcho, wos würkli interessiert.. er welli kei Aschissgsichter meh debi. Tja, so händ mir halt eusi Täg mit Strand oder shoppe verbracht.
- Ernährig: Pizza, Pringles, Mars.. Schoggigipfeli (ned so de Hit in Italie)
- Drinks: tüür (allerdings au seeeehr stark!!)
- WC: ständig verstopft
Händ eus brutal gfreut gha, wo mer wieder händ chönne d’Heireis aträte. Im nachhinein esch es aber immer wieder witzig über die Reis z’rede und soooooooo schlächt esch es dänn doch au wieder ned gsi.. oder?! ;-)
