Fachhochschule Aargau.. (oder neu Fachhochschule Nordwestschweiz..)
Studiengang Betriebsökonomie
Also ich chan euch allne ja nur ein Tipp geh.. ned a d’FH Aargau z’gah go de Bachelor in Betriebsökonomie mache! Usser ihr interessiered euch irgendwie für struubi Sache..
Eigentli hani scho nach de erschte paar Täg dete gwüsst das da gar nüt für mich esch.. Kennzahle, Unternehmensbewertige, Business-English, Fibu und Bebu.. wer interessiert das? Nei ächt, fragi mi würkli!! Aber eigentli hett ich das ja scho gmerkt gha wenn ich mich zersch ächli besser informiert hetti, statt eifach mal wieder es Studium azfange..
I de erschte Woche hämmer grad en super Praxiseinsatz gha am Hallwilersee.. zersch go Gstrüpp und Bäum umtue ime Wald, dänn amene Hang go Obstbäum pflanze.. Han ich wel-le Försterin werde oder was?! Naja, sither simmer eigentli no immer im Schulgebäude blibe. Wahrschinli het das sölle en erschte Abschreckigsversuech vo de Schulleitig si um d’Klasse nochli chliner zmache.. oder si händ vo dene Buure dete mega Stutz abote becho und dänkt sie verdonneret eifach ihri Studente zu dere Sklavearbeit.. Öppis guets hets allerdings au gha, wenn’s alli so ackackt, lernt mer sich bim umemotze mega schnell kenne.. und verbün-det sich.. hehe..
Jetzt bini im 3. Semester.. läck bobby vergaht die Ziit!! Scho en Viertel und drü Woche verbi!! Ganz so schlimm wie am Anfang find ichs au gar nümme.. entweder mues sich s'Studium verbesseret ha, oder ich bin jetzt en Business-Woman? *kreisch*
D'Klass esch au super, muesi ächt säge! Zwüsche 22i und 45i alt, Männlein und Weiblein öppe halbe halbe.. Bsonders sit de letschte Prüefige mached mer immer meh au im Klasseverband, findi no cool.. Hani bisher gar ned kennt, weder us de Bez no vo de Kanti geschweige dänn de Uni.. Natürli gits au Lüüt, mit dene hani bis hüt no chum es paar Wörter gwächslet, aber easy.. "Leben und Leben lassen".
*****************aus dem Schulalltag***************
Dr. math. Marianne Ort: "Wer druschunnt (Integral- und Differenzialrechnig) und sich langwiilt söll ufstrecke.."
U. M.: "Sie, chan mer au ufstrecke wenn mer sich langwiilt und aber ned druschunnt?!" 
Giezedanner (oder wie au immer er heisst..), im 3. Semester: "Sind Sie neu in dieser Klasse?"
Schülerin: "Nei nei, allerdings chömed sie mir au ned bekannt vor.."
Mühlhäuser zu J.Z.: "Chönd Sie bitte mal ächli ufmerksamer und ruhiger si.. Sie brummed wie en Rasierapparat vor sich ane.."
R. Niggli zu M.D.,der eine Frage stellt (auf welche sie leider keine Antwort weiss): "Also wenn Sie mich noch einmal verwirren, können Sie lieber gehen.."
